Sakelakoan ere euskaraz

Aintzane LARRAÑAGA

Euskaraz ikasteko aplikazio bat sortu berri du Elhuyar fundazioak mugikorretarako. Donostian egin dute Moblang tresna berriaren aurkezpena Elhuyar fundazioko zuzendari Itziar Nogeras, aplikazioaren arduradun Danel Solabarrieta eta Zipreko Neurozientzia eta Teknologia Institutuko zuzendari Yiannis Laourisek.

Aplikazio honekin, euskaraz ez dakiten helduak hizkuntza ikastera bultzatu nahi dira. Horretarako, gaztelania-euskara eta euskara-gaztelania hiztegiak, hitzak praktikatzeko irudiak, audioak... eta abar eskaintzen ditu. Hau guztia moblang.eu webgunetik deskargatu daiteke, eta mugikorrean instalatu ondoren, edozein momentutan erabili.

Momentuz MicroSD txartela duten mugikorretan edota Java aplikazioa exekutatzen dutenetan soilik dago erabilgarri, baina iPhone eta Android sistemetan ere jarriko dutela adierazi dute Nogeras, Solabarrieta eta Laourisek.

Proiektu hau Europako Batasuneko Hezkuntza eta Kultura Batzordearen babespean eraman da aurrera, eta nazioarteko hainbat enpresek eman diete laguntza Elhuyar fundazioko kideei.